July 28, 2015

IMSAN A INAUGURA SU SECCION DI DIALYSE

IMSAN A INAUGURA SU SECCION DI DIALYSE

2013-09-19 08.57.40

ImSan a laga remodela y adapta e edificio di Centro Medico dr. R. Engelbrecht den un tempo record di 12 siman pa asina por inaugura e seccion di Dialyse. E facilidad aki lo bay beneficia e pashentnan di henter Aruba, principalmente esnan di San Nicolas y vecindario.
Den un conbersacion cu e hefe financiero di ImSan, señor Gregory Croeze, e a elabora riba varios aspecto relaciona cu e seccion di Dialyse.
ImSan despues di a haya e financiamento necesario a tuma e actividadnan di dialyse di Clinica Posada over, incluyendo e personal y algun ekipo.

ImSan a inverti alrededor di 2 miyon florin cu ta un suma considerabel, di cual 1 miyon a bay pa haci e cambionan y adaptacionan necesario den e edificio ya cu esaki originalmente no a wordo construi pa inclui un seccion di Dialyse.
ImSan ademas a inverti den ekiponan nobo manera stoelnan special pa dialyse y un sistema di reverse osmosis cu a bin for di Alemania. Por bisa tambe cu e ekiponan cu a busca for di exterior ta esunnan di mas moderno riba mercado international.
Principalmente e pashentnan di San Nicolas y vecindario lo beneficia enormente cu e apertura di e seccion di Dialyse aki ya cu awor ta posibel pa dialysa mas cerca di cas y asina no tin cu haci un recorido te na playa of hospital y tambe nan por ta mas lihe na cas despues di a dialysa lo cual sigur ta un alivio pa hopi pashent.

Actualmente ImSan tin e capacidad pa trata 40 pashent di dialyse pero cu e posibilidad pa expande te cu 72 pashent. Pa esaki sosode ImSan mester di mas enfermeronan specialisa den dialyse. P’esey e director, dr. J. Rajnherc, a biaha recientemente pa Hulanda pa entre otro sondea e posibilidad pa recluta e personal specialisa necesario.

E intencion ta tambe pa den futuro haci Dialyse Peritoneal
Actualmente ImSan por ofrece loke nos ta yama Hemo Dialyse cu ta e sistema di haci dialyse via e ader di e pashent. Den futuro ImSan lo prepara dos ekipo pa haci Dialyse Peritoneal tambe. Esaki ta un otro proceso pa dialysa na unda cu lo haci uzo di un catheter cu ta pasa via e bariga di e pashent.

Acuerdo cu Baptist Health South Florida (BHSF)
For di aña 2012 ImSan tin un acuerdo cu BHSF pa adapta e edificio den un Centro di Oncologia. A haci uzo di e experticio di BHSF pa loke ta trata arkitectura y remodelacion. ImSan ta hopi agradecido na BHSF pa e sosten y ayudo ricibi den esaki. ImSan tin e meta pa haya e certificacion di JCI cu ayudo y sosten di BHSF pa asina por atrae turismo medico especialmente di esnan den nos region.
ImSan ta sumamente agredicido na AZV y tambe na e bestuur di Clinica Posada pa tur e cooperacion ricibi.

ImSan, where people meet care.

2013-09-19 10.12.47

2013-09-19 10.43.05

2013-09-19 11.08.15-1

2013-09-19 11.20.59

Related posts

2 Comments

  1. GIGD

    Haha Atrobe AVP ta pronkia cu nan a hasi algo pa San Nicolas. E Plan ey tabata tey caba. Ta djies nan hanja chens pa caba cune. Nan a paga e nefroloog anjanan sin a caba cu e projecto y aworey e por cuminsa cu su Trabao. Corda e familynan di Richard Visser cu ta den servicio. Henter un familia. Esey ta AVP. DIOS Mes lo baha nan, pasobra Babylonia lo cay manera un patia.

    Reply
  2. Awor si ta bon

    Tur loke MEP a bin na proyecto, pa AVP tur tabata malo. Pero poco nos ta realisa con egoista e hendenan aki ta. Tempo cu Booshi a bin cu e mesun proyecto y mas ainda pa IMSAN, tur cos tabata corupto pa AVP, pero awor ata nan ta pronkia cune. Mescos cu Ritz Carlton y otro proyectonan.

    Reply

Leave a Reply

Your email address will not be published. Required fields are marked *


*