Ya 6 luna ta pasando y te ainda Gabinete Mike Eman no a entrega presupeusto 2013 na Parlamento

Entrega di presupuesto mester tabata dia 1 di september 2012!
Desde November 2009 cu Gabinete Mike Eman a asumi poder, ningun di e presupuestonan di pais Aruba pa loke ta e añanan 2010, 2011 y 2012 no a wordo entrega na tempo na Parlamento. Sinembargo pa loke ta presupuesto 2013 esaki a kibra tur record, ya cu nos ta yegando fin di februari y te ainda – despues di casi 6 luna – e presupuesto aki no a ser entrega na Parlamento. Ta increibel cu un partido AVP cu tempo cu nan tabata den oposicion tabata gaba cu nan tin tur clase di presupuesto alternativo, awe despues di casi 4 aña na mando, te ainda no por a entrega ningun di e presupuestonan di pais Aruba na tempo. Manera ta un tradicion caba, esaki lo mester a sosode dia 1 di september 2012. Mescos cu tur e otro presupuestonan anterior, den e presupuesto di 2013 ta ser determina y aproba tur e entradanan cu gobierno lo haya y tur e gastonan cu gobierno lo haci den 2013. E diferencia ta e deficit of surplus financiero. Si ta un deficit financiero, esaki gobierno lo mester bay cubri door di fianzanan local y internacional.
Den pasado partido MEP na mayoria ocasion a entrega e presupuestonan di pais Aruba na tempo y te hasta den e promer periodo di Gabinete Oduber III (2001-2005) a logra entrega tanto e presupuesto di 2004 como esun di 2005 na tempo na Parlamento. Hecho ta cu tur e presupuestonan entrega door di gobierno di MEP tabata realistico caminda no a haci magia cu cifra manera cu a sosode den pasado durante Gabinete Henny Eman, esta cu nan a pone e entradanan mas halto y e gastonan mas abou posibel y p’asina yega na un surplus ficticio.
Por ultimo, lo ta na su lugar pa Gabinete Mike Eman – promer cu nan entrega e presupuesto 2013 – nan revisa y baha tur nan gastonan innecesario, tur e gastonan miyonario di viahenan di ministronan den exterior, tur e pagonan di salario exorbitante na compinchinan politico, pensionadonan, periodistanan comprometi y consultantnan, gastonan di tur e conferencianan miyonario etc y p’asina nan por presenta un presupuesto mas sobrio posibel, caminda nos por mira un reduccion drastico di e deficitnan financiero y debenan cu ta colga manera un guiyotina riba cabez di nos pueblo. Ta di spera cu e biaha aki Conseho Consultativo lo no bolbe declara e presupuesto 2013 como irealistico, ya cu nan tambe a cuminsa fada di mira con tur e cifranan manipula ta wordo poni bao di nan nanishi door di Gabinete Mike Eman.
E potret adhunto ta mustra e momento cu e presupuesto 2004 a ser entrega na tempo door di Gabinete Oduber, esta riba dialuna atardi dia 1 di september 2003.