Un momento hopi special: Paseo Herencia ta rindi tributo na Nos Himno y Tata di Nos Cultura

Minister Dowers como Minister Interino di Cultura:

ORANJESTAD: “Tabata un honor imenso pa mi por a comparti un momento asina importante cu Padu del Caribe na Paseo Herencia diabierna cu e develo di e splicacion di Nos Himno na e idioma ingles banda di e original na papiamento,” Minister Arthur Dowers a bisa. “Ta asina special cu no solamente Paseo Herencia a pone aki un muraya dedica na Nos Himno, pero tambe a dedica extra atencion na Nos Tata di Cultura y co-autor di e himno y a laga crea y pone un busto di Padu del Caribe aki,”el a añadi.

E titular di Husticia y Enseñansa tabata presente na e ocasion special den su funcion como Minister Interino di Cultura.

E mandatario a comenta cu e ta considera loke Paseo Herencia a haci un gesto bunita, pasobra e ta comparti cu nos turistanan e nificacion di nos himno. El a expresa e deseo pa Paseo Herencia por sigui sostene e cultura di Aruba pa medio di nan dedicacionnan special na nos herencia, cual ta poni den forma sea di potret of escultura den e centro comercial na Palm Beach.

Padu del Caribe a expresa cu el a keda hopi contento cu e trabao cu Paseo Herencia a haci pa presenta e himno na nos turistanan na ingles.

Na final di e ceremonia, cu orguyo y hopi emociona Padu a cumpli cu e peticion di esnan presente y a canta e prome couplet di e cantica cu originalmente el a crea hunto cu sr. Rufo Wever, dfm, no como himno,pero como un muestra di nan gran amor pa Aruba.

Ora cu Aruba a dicidi cu e isla mester su mes himno, Lio Booi a wordo pidi pa añadi un couplet y Aruba Dushi Tera a bay di un bunita wals pa bira Himno di Aruba. Aruba Dushi Tera a wordo introduci como simbolo nacional hunto cu nos bandera 36 aña pasa.