Tur MAVO bao SKOA a haya 2 dia di workshop

Diahuebs 3 y Diabierna 4 di Januari 2013, SKOA a organisa dos dia di estudio pa su 5 schoolnan di MAVO cual ta Maria College, La Salle College, Colegio San Antonio, Colegio San Augustin y Filomena College. E dianan di estudio aki a tuma luga nan La Salle College. E meta di e dianan ta pa tin intercambio di idea pa asina yega na un syncronisacion di curiculo di e materianan cu ta duna na MAVOnan resorta bao di e fundacion. Riba e dianan ey tur docente cu ta traha na e MAVO-nan a reuni hunto pa asina delibera riba diferente materia pa asina conhuntamente jega na uniformidad na cual tur school mester tene nan mes na dje. Tur docente y colega a keda reparti den grupo, unda cada materia a haya su debido atencion. Cada grupo a haya un of mas guia y nan a percura, cu na final di e dos dianan di estudio, tin un lista di palabracion cu e docentenan mes a traha. Mester a yega na un lista di puntonan di atencion y preocupacion y tambe loke por ta mehoracion riba e terenonan aki. E syncronisacion aki a percura pa tur e schoolnan MAVO den e caso aki esunnan di SKOA, core riba e mesun liña pa loke ta trata contenido di materia. A delibera riba aspectonan di metodo, e forma di presenta e materia, e temanan y tambe e preparacion di e alumno ora cu e ta bay di ciclo basico pa ciclo avansa.
Na final di cada dia a trata tambe puntonan cu a fortifica e aspectonan di norma y balor y tambe e aspectonan di seguridad den cada school. E resultado di e dos dianan aki lo keda discuti den seno di SKOA y lo yega na desicionnan cu lo implementa den cada school. Pa loke ta trata e aspecto di seguridad SKOA ta trahando caba riba un protocol di seguridad, pero door di tende un grupo mas grandi di docente lo por agrega algun punto na e rapport cu pronto lo keda presenta pa SKOA riba e aspecto di seguridad.