Ta papia di cinco strea pero Aruba ta usa sistema anticua

Sr. Rudy Lampe a duna di conoce cu e dianan aki ta pa busca plachi di number nobo cual ta un cuestion di para den filanan largo. Tur aña ta mesun storia cual ta un molester y gastamento di placa innecesario. Paisnan modern tin un number di auto codifica cual bo no ta cambia cada aña. Impuesto ta wordo paga pa haci uso di e careteranan cual informacionnan ta disponibel ora e polis lesa cu su aparato codifica di auto. No tin mester di para den filanan largo pa busca number cada aña atrobe y asina Aruba ta spaar hopi placa tambe. Pa cada biaha cu laga traha numnernan di auto ta costa placa cada aña cual na final di aña hopi di esakinan mester wordo benta afor pa motibo cu no a wordo busca. Mas cu claro tin hende ta gana placa cu e negoshi aki pero pa Aruba esaki sigur ta malgastamento di placa. Segun Gobierno, Aruba ta un pais di cinco strea pero mirando nos sistemanan, esakinan ainda ta atrasa. Ora wordo papia di pais cinco strea ta paso ta cumbini interes di gobernantenan pero e sistema anticua di number di auto no ta cumbini Aruba.