Ta invita pueblo di Aruba pa asisti na Parlamento diahuebs mainta 9’or durante e reunion publico

Candidato di MEP Francis Jacobs:

Ta invita pueblo di Aruba pa asisti na Parlamento awe mainta 9’or durante e reunion publico

Francis Jacobs, candidato di MEP ta haci un invitacion general na pueblo di Aruba y di Noord en particular, pueblo catolico, comisionnan di cuido di naturalesa y medio ambiente y tur compania y conciudadano cu tin nos turismo na pecho pa por ta presente awe mainta den Sala di Parlamento p’asina sali na defensa di nos comunidad, nos yiunan, nos medio ambiente, nos naturalesa, nos tera sagrado y un di nos sitionan turistico nombra entre e 100 sitionan mas bunita na mundo, esta Alto Vista.

Desde aña pasa mas di 8 luna, na diferente ocasion partido MEP a haci un apelacion pa un reunion publico referente e construccion di e Parke di Mulina na Urirama. A haci peticion di documentonan relaciona cu promesanan di Minister President Mike Eman pa hala e mulinanan 150 meter leu di Kapel di Alto Vista, sinembargo te dia di awe no a bin ningun reaccion por escrito. Ta mustra cu AVP sin importa nada otro ta decidido pa bin cu e proyecto na Urirama trapando ariba tur clase di respet di pueblo di Aruba, di Noord, pueblo catolico y demas comisionnan cu ta sali na vanguardia di naturalesa, medio ambiente y turismo. Hecho ta cu no tin ningun prueba cu e mulinanan aki no ta exclui e riesgo y peligro pa salud di nos hendenan. A wordo proba atravez di declaracion di e propio compania di WEB N.V. cu e proyecto aki no ta beneficia e pueblo cu energia mas barata. Mas ainda e proyecto aki lo destrui parti di nos tera sagrado y nos naturalesa. Lo kibra tur trankilidad di tur nos hendenan devoto, nos hendenan catolico cu tur dia ta acudi na nos kapel den tur trankilidad y cu nan fe. Un area cu ta wordo bishita tur dia pa diferente turista cu ta bin bishita un di nos joyanan di mas valor cu nos tin, cu un historia sagrado y un nificacion di nos herencia permanente. Pa tur e motibonan aki y mucho mas nos no por acepta den ningun forma pa Minister di Finanzas ni Minister President sigui trapa ariba nos, trapa riba nos honor y dignidad.

Mi ta invita pueblo di Aruba pa asisti na Parlamento awe pa 9’or di mainta durante e reunion publico. Bin demonstra bo amor patrio y alavez sali na defensa di nos patrimonio y salud di nos conciudadanonan.