Ta duna reconocimento ja cu doño di trabao mes no ta haci esaki

Den un entrevista cu sr. Guillfred Besaril di sindicato SPA e ta comenta mas di e entrega di reconocimentonan na e miembronan. Sr. Besaril kier a desea tur hende un bon drenta den 2013. Na final di aña a tuma lugar e entrega di algun reconocimento pa miembronan di SPA conhuntamente cu POVA Country Club pa cual a honra diferente colega en total di 17 miembro y asina duna nan e respet y honor merecidamente. E importante ta cu nan a wordo honra paso na aña 2012 algun a cumpli 25, 30 y 35 aña den Cuerpo Policial di cual sr. papito Comenencia cu ta actual vocero di polis y sr. Cheche Bronswinkel cu ta trahando actualmente na politie opleiding school como docente ta un di esnan cu a sobresali mas cu nan 35 aña den servicio. Nan a ricibi un bunita obsekio diparti di Sindicato di Polis. Di e forma ey kier a gradici nan pa e añanan di servicio cu nan a brinda no solamente den Cuerpo Policial sino na e comunidad completo. E motibo principal pakico sindicato ta duna e reconocimentonan aki ta paso cu doño di trabao mes no ta haci esaki. Gobierno tin un sistema cu ora bo cumpli 25, 30, 35 aña den servicio bo ta haya e acustumbrado envelop. E envelop ta un simple envelop pero un reconocimento ta algo grandi na unda bo ta gradici e persona pa su añanan di servicio brinda na e compania. No solamente a duna nan un obsekio sino cu a duna nan palabranan di elogio y gradicimento pa tur nan añanan y tambe bisanan con importante nan ta pa e Cuerpo Policial. Gobierno ta duna un envelop pa cual nan mester practicamente roga y recorda Gobierno cu nan a cumpli e añanan di servicio. Desde cu sr. Besaril ta den sindicato di polis a zorg pa di e forma aki humilde pero toch bunita honra nan pa e dedicacion cu nan tin pa cu nos pueblo.