Sr. James Richardson – Trahando pa establece un federacion di Mixed Martial Arts

Nos por a compronde cu sr. James Richardson cual ta presidente di Mixed Martial Arts Foundation Aruba y su team ta trahando duro pa eleva e nivel di Mixed Martial Arts na Aruba. E deporte aki ta un combinacion di tecnicanan di diferente deporte e.o. judo, wrestling y boxeo. Por bisa cu no a cuminsa na e forma corecto na Aruba. Na momento cu Minister Richard Visser a acepta e encargo di Minister di Deporte, a papia cu dirigentenan y a enfatisa cu e deporte mester wordo regula cual gobierno lo no acepta pa peleanan tuma lugar pafor di ring. Segun Minister cu MMA no ta un pelea di gai y a bira tempo pa e wordo regula manera mester ta cu tur regla y regulacion ja cu esaki ta un deporte extreme professional cu tin su merito. Fundacion a aserca gobierno y ASU pa e reconocmento di MMA pa e deporte tambe por bin na remarke pa e sosten. Sr. Richardson a wordo bisa cu e mester bin cu un “plan van aanpak” cual mester eleva e nivel di e deporte como tambe establece e federacion. Su persona a wordo apunta pa asina yuda establece e federacion di MMA na Aruba y pa cumpli cu un di e prome rekisitonan di e plan. Pa cu esaki a invita sr. Robert Hinds cu ta un UFC Referee y un instructor reconocir pa ABC ja asina e por duna un seminario di tres dia na Aruba como tambe prove certificacion di e referee y huesnan. Un total di 25 persona a atende e seminario di cual diabierna tabata training pa refereenan. Diasabra a prove pa e oficialnan cu ta husga e peleanan na “cageside.” Diadomingo a instrui e tecniconan di timekeepers, gatekeepers y inspector. E prome pasonan a wordo tuma cu e curso aki pa cu e deporte di MMA ja asina e por crece manera mester ta na Aruba. MMA Aruba ta agradecido di por a conta cu sosten di Minister como tambe Gobierno y Balashi cual ta e sponsor grandi di MMA Aruba. Otro sosten cu MMA Aruba a ricibi pa realisa e seminario ta di Renaissance Resort, All Drive Rental Car, Palm Beach Plaza Mall y Ishmedia. MMA Aruba ta spera di por conta cu sosten di un y tur cu a participa como tambe esnan cu lo participa den futuro.