Sluggers campeon di Copa Mike Eman

Diadomingo den oranan di atardi a finalisa despues di algun siman di competencia softbolistico otro edicion di Copa Mike Eman.

Den e wega final Sluggers a gana e ekipo di Bestuurskantoor pa bay cu e titulo.

“Mi ta hopi orguyoso cu un torneo a wordo dedica na mi nomber, y cu awor a finalisa despues di varios siman di competencia hopi anima,” e Prome Mandatario di Aruba, mr. Mike Eman, a bisa durante e ceremonia di entrega di premio.

E tipo di torneonan aki, Prome Minister Eman a bisa, ta duna refuerso na loke Gobierno ta considera masha importante. Y a splica cu Gobierno ta trahando hopi duro den e barionan pa mehora calidad di bida di e ciudadanonan, pero tambe pa reenforsa atrobe e lasonan entre e ciudadanonan. E enfoke cu tin riba tereno di bala, ta hustamente loke cu Gobierno kier logra. Tin centro di ciudad y tin barionan, pero importante tambe ta cu tin bisindario. Gobierno aki a cuminsa dedica atencion na bisindarionan, manera a sosode na Jan Flemming, Calbas, Cura Cabay, Montserat, Bushiri, etc. Hopi bes ta lubida cu e bisindarionan tambe mester di atencion. Cada un tin nan orguyo y identidad, y merece di haya nan atencion. Principalmente pasobra ta den e bisindarionan e comunidadnan ta bini hunto.