SIAD no ta husto cu e pagadornan di belasting

Sr. Andin Bikker lider di PDR ta haye confronta cu hopi pregunta di personanan cu ta aserca su persona di cual un di nan sigur ta e pregunta tocante cobransanan di Belastingdienst di aña 2001 te cu 2003. Ora cu e hendenan aki obhecciona, SIAD ta bisanan cu nan tin un maneho cu ta ensera cu nan no ta trata niun carta di obheccion cu ta referi na añanan cu ta mas biew cu 5 aña, pero SIAD ta sigui cobra e suma si. A base di algun investigacion a Sali na cla cu den nos ordenaza di Invordering Directie Belastingen tin un termino para cu belasting ta caduca despues di 5 aña. SIAD no ta tene cuenta cu e termino aki y ta cuminsa cobra hende debenan di hopi tempo atras sin tene cuenta cu e cartanan di obheccion. No ta para den ley tampoco cu no ta trata e maneho di cartanan di obheccion di debenan mas biew cu 5 aña. SIAD no ta husto cu e pagadornan di belasting. Den mayoria caso ta trata di hendenan cu no sa kico ta nan derecho y kizas no a entrega nan aangiftenan paso nan no tin trabao of no tabata biba na Aruba. Den caso asina, SIAD mes ta calcula un suma pa bo “ambsthalve aanslag” cual ta pone cu den sistema di SIAD, hopi hende ta mustra manera cu nan debe sumanan exorbitante mientras cu nunca nan no tabata tin un entrada. Lo bay adresa esaki pronto. Un amienda a wordo pasa pa sr. Bikker na 2012 unda cu a propone pa bin cu proteccion fiscal den 3 instancia ja asina diferente huez lo wak bo caso di cartanan or abo tin diferencianan di opinion cu belastingdienst. E clima di inversion lo wordo drecha cu esaki y abo tin e siguransa cu bo derechonan lo ta protehi, segun sr. Andin Bikker.