Santa Roza cu anochi informativo pa cunukeronan

Durante e ultimo 2 aña por aprecia cu un interes enorme a wordo rebiba ariba nos isla pa loke ta trata Agricultura, Cria y Pesca. Nos por aprecia cu tin diferente cunucu cu pa hopi tempo no a wordo huza, atrobe a haya un bida cu plantacionan di tur sorto di berdura y fruta. Esaki Santa Rosa por a confirma mediante e cantidad di demanda pa trabaonan di tereno, peticion pa conseho, compras di producto y especialmente durante e Mercadonan di Santa Rosa cual ta un actividad cu sigur a sirbi no solamente pa ofrece productonan fresco pero cu tambe a motiva hopi cunukero cu pa un temporada tabata inactivo y tambe a motiva un cantidad grandi di hobennan pa inicia cu nan propio producion. Tambe por aprecia cu actualmente tin un cantidad grandi di criadornan cu ta activo bek. Pa loke ta trata Pesca, nos por aprecia cu awendia tin un cantidad grandi di Piscadornan hoben cu a inicia cu un practica cu sigur ta forma un parti importante di nos cultura. E parti positivo di por conta cu un produccion local constant ta cu consecuentemente esaki lo asegura cu tur entrada ta keda den nos economia local enbes di bay afor y sigur ta sirbi como un entrada mas stabil pa nos productornan. E exito tras di Santa Rosa su strategia di concientizacion local a resulta no solamente un crecemento enorme den nos sector primario pero tambe a motiva e interes di e mercado local pa come mas saludabel y organico cu un crecemento impresionante den e demanda pa productonan local. Awendia un cantidad di supermercado y restaurantnan tin e deseo pa haci negoshi cu nos productornan, pa asina por ofrece productonan produci na Aruba mes.
Facultad di Hospitalidad y Turismo (FHTMS) di Universidad di Aruba na su turno a inicia cu e bunita projecto “Chanita ta di Fiesta” cual ta un programa diseña pa motiva nos Chefnan di Aruba encuanto di e uzo di mas productonan local enbes di productonan importa. E projecto a bira un exito y ya tin varios restaurant cu oficialemente a registra y ta formando parti den e programa aki. Mester remarca cu e projecto “Chanita ta di Fiesta” a wordo reconoci internacionalmente y na 2012 a ricibi un premio otorga door di World Tourism Organization como un projecto innovativo y sustenibel na bienestar di e isla su producion di cuminda.
Mirando e diferente factornan menciona, Santa Rosa y Facultad di Hospitalidad y Turismo (FHTMS) di Universidad di Aruba lo organiza un anochi informativo encuanto di e projecto y con e partnership entre nos productornan local y nos Chefnan por beneficia ambos partido y sigur nos sector primario. Santa Rosa ta spera di conta cu un cantidad grandi di cunukeronan, criadornan y demas productornan pa boso por wak con e programa aki por tin diferente beneficionan interesante y con Santa Rosa por sostene boso. E anochi informativo lo tuma lugar, Diarazon dia 13 di February proximo na Santa Rosa for di 6’or di atardi te cu 9’or di anochi. Pa esnan cu tin cualkier pregunta por tuma contacto cu sra. Glenda Bareño of Ludy Rasmijn na Santa Rosa por medio di e telefon 5858102 of via mail na info@santarosa.aw