Santa Rosa a presenta su linea completo di productonan organico y natural

Sra. Nathalie Maduro, Directora di Santa Rosa a comenta riba e aspecto di responsabilidad di parti di e departamento pa asegura cu e processo completo ta wordo ehecuta di un manera responsabel. Santa Rosa su meta ta pa asegura cu tur producto cu ta wordo huza den tur cunucu of plantacion, ta productonan cu na final ta logra un cosecha liber di cualkier material toxico. Esaki ta prome biaha cu Santa Rosa ta introduci productonan organico y lo stop e venta di tur productonan cu ta toxico como parti di nan maneho pa asegura un produccion sano. A tuma e initiativa pa introduci e linea aki. Santa Rosa ta trahando actualmente riba un plan integral pa asegura e seguridad di cuminda a largo plazo pa nos habitantenan cual ta encera diferente strategianan manera por ehempel, mehoracion di e servicio y equiponan di Santa Rosa mes, mehoracion di e damnan di awa dushi, renovacion di posnan di awa dushi pa yuda e cunukero, projectonan di plantacion di hooi pa asegura produccion di carni y lechi, projecto di RWZI na unda cu durante temporada di secura e cunukeronan por sigui conta cu awa pa nan produccion etc. Como parti di e plan aki y pa asegura cu nos isla ta keda intacto di productonan toxico cu sigur lo tin consecuencia pa nos proximo generacionan cual Santa Rosa ta tuma e prome paso aki. E siguiente paso cu lo bay wordo tuma lo ta pa traha ariba un conseho extenso pa wordo entrega na Minister Oduber pa por introduci un ley cu lo stop permanentemente e importacion di tur productonan toxico di e nivelnan 1 y 2 pa uzo den agricultura. Lo tuma tempo pa convence tur cu e productonan aki ta mesun efectivo cu esunan toxico cu ta ofrece resultadonan di inmediato pero cu consecuencianan fatal pa e ser humano y nos medio ambiente cu ta uno hopi vulnerabel. Santa Rosa tin confianza cu e calidad di e productonan aki lo demostra cu e paso aki ta uno cu lo trece beneficionan grandi pa nos hendenan, nos medio ambiente y sigur pa nos producion local segun sra. Nathalie Maduro directora di Santa Rosa.