Prioridad di RED ta enseñansa

Recientemente sr. Rudy Lampe a anuncia durante e reunion genereal di miembrecia cu e puntonan di accion pa cu e eleccion 2013 cu a keda aproba ta riba e website www.redaruba.org
E programa ta pone hendenan central: e mucha, e hoben, e hende grandi, esun cu necesidad special, esun cu ta pertenece na un minoria. Nos prioridad numero uno ta educacion, cu e meta pa hisa e nivel di enseñanza di nos poblacion laboral pa ta un pais di cinco strea. Bo no por bira un pais di cinco strea si bo ta usa fondo di FDA destina pa enseñanza pa traha un tram. Esaki ta exactamente loke a sosode cu Gabinete Mike Eman: e fondo di FDA destina pa traha e scol di Mavo/Havo na Noord a keda usa pa cumpra tram na Merca.
Otro punto innovativo di nos programa ta cu medio ambiente y salud ta keda relata na otro. No por tin green energy sin un green environment y un green environment ke men healthy environment. Pesei e projecto di Urirama no por bay dor. Investigacion cientifico nobo ta mustra cu sonido di low frequency ta afecta salud di hende, especialmente di mucha den desaroyo. Esei ta e caso di molina di biento, cu solamente ta responsabel si e ta poni na un distancia aleha di areanan residencial. Pesei mester monitor e salud di habitantenan serca di e parke di molino di biento di Vader Piet. Ya tin keho di salud a drenta di habitantenan serca di Vader Piet. Si ta asina mester cai un decision na favor di e salud di e bario aki y gobierno lo mester carga e gastonan financiero di esaki.
Mescos mester atende e peliger di radiacion permanente. Nos tur ta corda e caso di habitantenan di Papilon contra Digicel representa pa mr. Bikker cu a pone un mast serca di e casnan. Na Europa tin exigencia di tanto distancia pa pone un mast pa un red telefonico. Lamentablemente Aruba ainda no tin ley di medio ambiente pa proteha salud di nos pueblo. Esaki ta conta tambe pa e cantidad di lugarnan ilegal di dump sushi cu ta serca di casnan unda hopi hende ta biba. Nos tur ta comprende cu falta di hygiene ta afecta salud di hende. E programa di RED ta presenta un vision nobo pa e maneho di sushi. Pesei bishita nos website: www.redaruba.org