Polis ta informa di Atraco y ta pidi tips di pueblo

Riba diabierna 1 di febrauri 2013, pa mas o menos 12:50 ora, central di polis ta wordo notifica cu un atraco arma lo a tuma lugar na RBC (Royal Bank of Canada) Palm beach branch. Patrouillenan ta wordo manda na e sitio unda cu nan ta wordo informa cu tres hende homber, arma cu arma di candela chiquito y tambe un arma di candela largo, lo a drenta atraca e banco y despues huy den un auto blanco marca Daewoo. Segun informacion na e sitio, nan lo a los algun tiro cu arma di candela ora nan tabata pafo di e banco, durante nan huida. Patrouillenan cu a cuminsa cu un buskeda den vecindario a bin haya e auto un paar di minuut despues den vecindario di Koyari. Informacion di testigo ta bisa cu probablemente e atracadornan aki lo a huy despues den un pickup Toyota Hilux color di oro cu tinted glass.

Segun informacion e atracadornan lo ta tres hende homber, tur tres cortico (+/_ 1.60 meter) , color cla, cabey preto corta cortico.

Cuerpo Policial ta pidi cualkier persona cu por sa algo of cu por a wak algo pa por fabor yama tiplijn di polis 11141 y duna informacion anonimamente of yama central di polis na 100.

Atraco team y investigadornan tecnico ta na e sitio pa inicia e investigacion, mientras cu patrouillenan riba caya ta alerta.

Di parti di Korpschef sr. Richardson ta pidi pueblo pa coopera cu e investigacion pero tambe pa keda trankil y cu un confiansa grandi cu e caso aki lo ser resolve den un tempo razonabel.