PDR lo asisti cu placer na otro debatenan cu por presenta

Durante e conferencia semanal di PDR, sr. Andin Bikker ta comenta cu e lo bay tur debate cu lo por presenta paso e ta wak esaki algo positivo pa Aruba. Sr. Bikker semper ta habri pa forumnan caminda cu bo por comunica cu e audiencia y e publico di Aruba en general. Pa asina bin cu e ideanan y kico bo ta para pe si nan sostene bo den e aña electoral. Pa bin cu e visionnan con bo ta bay soluciona e problema pa e gobernacion y PDR semper su filosofia ta cu no solamente ta critica sino cu ta bin cu posibel solucionnan. PDR ta aplaudi tipo di forumnan asina cu ta duna e oportunidad, e formato pa netamente comunica e posibel solucionnan cu ta premira pa e problemanan cu ta azotando nos comunidad. Segun sr. Bikker, PDR no a escohe e format cu ATIA a escohe pero personalmente ta haya cu e formato ta hopi bon. E berdad si ta cu di e audiencia a bin cu un apelacion pa un proximo oportunidad bin cu e debate. PDR ta wordo invita y ta evalua con e programa ta hinca den otro y asina ta asisti si bin un debate. Sr. Bikker a compronde for di un representante di ATIA cu e audiencia a pidi pa bin cu un debate na un otro oportunidad y pa haci esaki na Papiamento. Nan lo bay traha riba esaki y cu placer PDR lo participa na esaki, segun sr. Andin Bikker.