Parlamento y Minister de Meza ta core pa e responsabilidad di laga evalua Vader Piet

Parlamentario mr. Xiomara Ruiz-Maduro:
Ta neglisha esnan cu kizas ta sufriendo a consecuencia di e molinanan di biento

Durante e debate publico riba e parke di molina di biento cu Gabinete Eman kier laga traha na Urirama, nos Fraccion di MEP a presenta un mocion den cual nos ta urgi Gobierno pa evalua e proyecto di Vader Piet y den caso cu constata cu e proyecto ta duna problema di salud na hende, pa tuma accion inmediato pa coregi e situacion aki. Lamentablemente e mocion aki no a conta cu sosten di mayoria den Parlamento. Asina ta bira bisto cu Parlamento y Minister de Meza ta core pa e responsabilidad di laga evalua Vader Piet y ta neglisha esnan cu kizas ta sufriendo a consecuencia di e molinanan di biento.

E ta conoci cu for di 2004 e gobierno anterior hunto cu WEB a cuminsa plania e parke di molina di biento na Vader Piet pa di e manera aki nos Pais tambe aporta na locual ta energia alternativo. Depues di varios aña di preparacion y ehecucion na fin di 2009 e parke di molina na Vader Piet a wordo inaugura. Despues di 3 aña di operacion Gabinete Eman a anuncia cu un di dos parke di molina lo wordo construi na Urirama, pero no a duna Pueblo un splicacion con e parke a funciona y ki beneficio Pueblo tabata tin na e parke di Vader Piet cu ta haci asina necesario pa bini cu un di dos parke di molina na Urirama. Ta bin aserca cu avanse di sciencia ta indica cu e molinanan di biento riba cierto distancia por causa problema na salud di hende. Pa e motibo aki ta bira necesario pa haci un evaluacion pa saca afor si e molinanan na Vader Piet por tin efecto riba e salud di e habitantenan den sercania di e parke.

Nos Fraccion teniendo na cuenta cu Gobierno no a evalua Vader Piet pa asina Pueblo por mira con nan a beneficia di e proyecto y preocupa cu e conclucion di expertonan riba e consecuencia di molina di biento pa salud di hende, a presenta un mocion pa Gobierno evalua Vader Piet y tuma e pasonan necesario si constata cu e proyecto ta duna problema di salud nan esnan den vecindario di e parke di molina. E ta di lamenta cu e mayoria den Parlamento y tambe nos Minister de Meza ta core pa nan responsabilidad y no a bay di acuerdo pa laga evalua Vader Piet. Asina aki nos ta perde chens pa yuda esnan den vecindario di Vader Piet cu kizas nan salud ta wordo afecta pa e parke di molina sin sa cu esaki ta e motibo real di nan enfermedad.