Parlamento ta aproba un mocion pa bende Bushiri mientras cu nan sa cu tin caso den corte

Parlamentario Sr. Arondino Croes (MEP)

ORANJESTAD – Pa basta tempo ta buscando solucion pa Bushiri Hotel. E gobierno anterior a traha pa busca solucion pa e hotel, pero casonan den corte cu e gobierno di Gabinete Eman 3 a laga atras a stroba e proceso. Parlementario Sr. Arondino Croes a indica cu den presupuesto 2012 fraccion di AVP su miembro a bin cu un mocion dilanti. A pidi un biaha mas pa aproba e maneho di Minister di Infrastructura y Minister di Turismo pa reconstrui e compleho di edificio di ex Bushiri. Naturalmente cu esaki ta cuadra den e mocion di dia 7 di juni 2011. Na mes momento a pidi Minister nan pa tene Parlamento di Aruba informa regularmente di e desaroyo aki. Ora a presenta e mocion aki Parlamentario Sr. Juan David Yrausquin a lanta para y cuestiona e mocion cu e keda presenta.

E Parlamentario a indica cu e Mocion di AVP a keda traha pa Minister Otmar Oduber. Cu esaki por mira cu e fraccion di AVP mes ta cuestiona otro cu e mocion no a bin di e propio fraccion. Parlamentario Sr. Arondino Croes a indica cu ya caba anteriormente a cuestiona e hecho cu Minister a yega di duna informacion na Parlamentario di AVP.

Parlamentario Sr. Arondino Croes a bisa esaki, basa riba e hecho cu Minister Otmar Oduber a pone cifranan riba papel y duna e mesun Parlamentario den discusion pa e lesa esaki den un conferencia di prensa. E Parlamentario di MEP Sr. Arondino Croes a indica cu nan a confirma nan ponencia aki ora nan a wak e conferencia di prensa. Awor por ripara cu e mesun miembro di AVP ta confirma kico a tuma luga den pasado. Parlamentario Sr. Juan David Yrausquin mes a confirma cu miembronan di AVP ta haya mocion for di Minister di Turismo pa e motibo aki e miembro di AVP a vota contra e mocion aki. Ta iresponsabel pa pone dos compania cu ta Sheraton y e otro Hard Rock, mientras cu gobierno ta na haltura cu tin caso den corte. Si un di e dos partidonan aki gana e destaho cu gobierno a haci, ta mas placa ta pone pa pais Aruba mester paga.

E hendenan cu ta den corte ta keda cu nan caso, sin importa e destaho. Ora cu ta bay den e fase pa destaho mientras cu no tin claridad den corte, ta un acto iresponsabel di fraccion di AVP.

“Bo no por bin cu un mocion asina aki den Parlamento pa aproba un maneho di Minister unda cu un miembro di AVP ta bin bisa cu esaki ta contra di constitucion”, asina Parlamentario Sr. Arondino Croes a sigui menciona. E mocion finalmente a pasa den Parlamento, unda cu e 11 miembronan di AVP a aproba e mocion aki.