Ora cero a yega pa Melvin Tromp trece su ‘pruebanan palpabel’ den corte of rectifica riba Hotel Central

Diabierna 4 di mei pa 2.or di atardi, corte lo trata e caso cu Edmond Croes a cuminza contra Sr. Melvin Tromp, relaciona cu difamacion di su nomber y enganjo contra di Croes. Tabata dia 20 di maart cu Melvin Tromp, den programa di Leoncita Arends a bisa cu Edmond Croes ta beheerder di Hotel Central y cu Edmond Croes a cobra 1 punto pico miyon florin di huur pa asina e haya un lekker leven. Ademas Tromp a bisa cu na 2009 prome cu eleccion, Edmond Croes a manipula pa y comete falsificacion pa asina prolonga e huur contract cu 5 anja. Edmond Croes di su parti a mustra a repetida ves cu e no tin nada di haber cu e huur di Hotel Central y cu nunca el’a cobra 1 florin di huur. Ken pueblo mester kere? Melvin Tromp apesar di a haya un carta di Mr. Ruiz dia 26 di maart 2012 pa e bay rectifica, Melvin Tromp a bay haci peor. Dia 28 di Maart enves di rectifica el’a bay haci peor y bisa cu e tin prueba palpabel di ken ta esun cu a cobra, referiendo cu Edmond Croes a cobra 1 punto pico miyon florin di huur pa Hotel Central. Ademas el’a bisa cu Edmond Croes a nenga cu e tin algo di haber cu Soffiene Holding Nv, cual ta un invento di Tromp, pasobra Edmond Croes nunca a nenga y es mas nunca tabata den discucion publico si encaso Edmond Croes ta donjo, accionista of director di Sofienne Holding Nv. Loke si Edmond Croes a bisa ta cu Hotel Central tabata pertence na su ABUELO, pero ora cu reparticion di bienes a tuma lugar, e ni su famia, esta su mama of rumannan tin nada di haber cu Hotel Central y nan no a firma contract di huur tampoco cu gobierno ni a cobra huur. Diabierna pa 2.or di atardi, Sr. Melvin Tromp tin tur oportunidad di MUNDO pa trece tur prueba cu e tin, di loke el’a tilda Edmond Croes di dje. Trece prueba of rectifica cu ba ganja! E caso aki sigur lo bira basta intresante. Esaki ta di dos caso cu Edmond Croes tin cu bay mesa berde pa asina solamente busca pa sa of prueba e berdad y nada mas cu e berdad. Edmond Croes lo wordo representa pa abogado Anthony Ruiz mientras Melvin Tromp lo wordo representa pa mr. Dello Gomez.