ODEPA ta duna mas apoyo financiero na Comitenan Olimpico Nacional

Sra. Nicole Hoevertsz, miembro di Comité Ejecutivo di ODEPA ta comparti su satisfacción pa cu e decisión aki: “Den e diescuater aña cu mi ta forma parti di e Comité Ejecutivo di ODEPA, a traha duro pa crea mas fondo. ODEPA awor ta un organización financieramente fuerte. E avance aki ta wordo inverti directamente den e atletanan y entrenadornan di nos continente. Esey ta hasi posible pa nan logra un mihor actuación durante Weganan Panamericano y Olimpico. Pa Comité Olimpico Arubano tambe esaki ta un tremendo noticia.” Mas cu un miyon dollar di apoyo directo, esey ta loke Comite Ejecutivo di e Organizacion Deportivo Panamericano (ODEPA) a dicidi den su reunion na Miami pa inverti extra den cada un di e 41 Comite Olimpico Nacional di e continente pa proximo 4 aña. En total ODEPA ta inverti mas cu 46 miyon dollar den e organizacionnan miembro. Miami ta centro di encuentro di e asociación continental, ODEPA, e siman aki. Durante e prome dia di reunión caba e directiva a tuma algún decisión sumamente positivo pa e Comitenan Olimpico Nacional. Nan lo ricibi mas cu un miyon dollar adicional pa inverti den nan atletanan. Tambe ODEPA lo inicia un programa integral di capacitación di entrenadornan di seleccionnan nacional, cu bista riba e Weganan Panamericano di Toronto 2015 y e Weganan Olimpico di Rio 2016. Na tercer lugar atletanan cu ta preparando pa e Weganan aki lo tin awor e oportunidad pa entrena den centronan di alto rendimento alrededor di e continente. Na di cuater lugar e comisionnan di trabao di ODEPA lo conta awor cu un presupuesto asigna pa por mehora nan actividadnan. Banda di e sumanan importante aki cu ta wordo inverti, tin ademas e programanan di Solidaridad Olimpico, cu ta sigui duna e Comitenan Olimpico Nacional un variedad di programa di desaroyo. Den e simannan nos dilanti COA lo elabora un plan di desaroyo hunto cu e federacionnan deportivo, den cua mester delinea con ta pensa di inverti e sumanan adicional aki. Objetivo ta pa Aruba tambe logra un mihor actuacion y resultadonan concreto den e añanan nos dilanti.