Nochi di peliculanan local y independiente presenta riba big screen

Fundacion AVI den colaboracion cu Ateliers ’89, Purple-Entertainment Group y sVe TV ta presenta ‘AVI Movie Night Fundraising’. E iniciativa aki ta pa recauda fondo pa futuro proyectonan di pelicula local.

E ‘Movie Night’ ta dividi den tres anochi unda cu lo presenta un short film local conhunto cu un pelicula independiente internacional. Filmnan lo wordo proyecta full HD riba un big movie screen den e confortabel aircondition Black Room di Ateliers ’89, Dominicanessenstraat 34. Showtime pa tur tres anochi ta inicia 8:00 P.M. y lo tin un intermedio unda cu e publico lo por cumpra algo di bebe of come.

E peliculanan:

- Diabierna 18 di mei ‘Muhe Frida’ & ‘The Skin I Live In’

- Diasabra 19 di mei ‘The Last Supper’ & ‘The Devil’s Double’

- Diadomingo 20 di mei ‘10 Ave Maria’ & ‘Melancholia’

E short film local di ‘Muhe Frida’ a gana e premio como miho short film ‘Aruba Flavor’ di Aruba International Film Festival 2011. E ta un art film contemporaneo cu ta expresa e 7 diferente alter egos di e artista Frida Kahlo. Alydia Wever ta portray Frida Kahlo, direccion tabata bao di encargo di e cineasta Felix de Rooy.

Riba e mes un anochi Pedro Almodóvar lo asombra nos cu su ultimo opera prima ‘The Skin I Live In’, un film cu ta nara e storia di un ciruhano plastico cu ta crea un cuero sintetico cu por resisti tur tipo daño.

Su siguiente anochi nos lo presenta e short film ‘The Last Supper’ di director Hyro Oduber, un short film local cu ta conta cu actuacion di Ferdinand Franca & Adriana Pereira.

Dave ta confrontando un crisis matrimonial y riba dje e ta haya un mal noticia.

‘The Last Supper’ ta acompaña pa e pelicula independiente yena cu accion ‘The Devil’s Double’. Un pelicula cu ta basa riba e yiu homber di Saddam Hussein interpreta pa e actor Dominic Cooper.

Pa e di tres anochi, e tan pidi short film cu a gana e premio como miho short film di Trinidad & Tobago Film Festival 2011 porfin lo ta riba e big screen di Ateliers ’89. E short film local aki dirigi pa Ryan Oduber conhunto cu Juan Francisco Pardo ta conta e storia di Mark un homber solitario en busca di felicidad. Mark ta haya su mes confronta cu dificultadnan, deseonan y miedo.

E anochi ta cera cu un pelicula di e visionario director Lars von Trier ‘Melancholia’. Kirsten Dunst conoci pa su notabel rol como chick di Peter Parker den Spider-Man ta actua den e film misterioso aki, unda cu un planeta nobo ta core peliger di boks cu planeta tera.

Ticketnan pa e movie night aki ta obtenibel na Van Dorp Dakota, na Bula Surf Shop y na Coffee4U, tambe por yama Francisco Pardo 266-2529 pa ticket, nos ta haci entrega. E ticketnan ta disponibel como Un Dia Ticket AWG 10,00 of como 3 Dia Pass AWG 25,00.

Pa mas informacion di e peliculanan y pa wak movie trailers por bishita AVI su website: www.audiovisualinstitute.com