No a tende nada mas di e meternan prepago

Durante un conferencia di prensa semanal di PDR, sr. Andin Bikker ta comenta cu atrobe hopi ta e personanan cu a aserca su persona encuanto e pagonan di coriente y awa. Hopi ta esnan cu ta confrontando problema pa paga nan coriente y awa. Esaki debi cu nan ta wordo sorpresa despues di un luna y mey cu cuentanan hopi halto cu nan no a spera di cual nan no tabata tin presupuesta. Sr. Bikker ta bay manda un carta urgente pa e minister encarga cu energia pa recorde ariba e suma di 100 mil florin cu a base di un propuesta den e presupuesto alternativo a wordo presenta y cu a wordo aproba door di parlamento netamente pa stimula e introduccion accelera di meternan prepago. Cu meternan prepago bo ta maneha bo budget y asina bo ta controla bo consumo y sa kico ta bo gastonan pa cu fin di luna. E projecto aki a wordo anuncia door di compania estatal Elmar basta luna caba. Nan a bin cune pa pre inscripcion pa pueblo di Noord y Sanicolas. No a tende nada mas di esaki. Esaki mester wordo amplia pa full Aruba paso e personanan cu ta aserca fraccion di PDR no solamente ta biba den e districtonan ey pero e otro districtonan tambe ta wordo afecta. E solucion mas practico ta pa bin cu un solucion mas pronto cu ta posibel pa introduci e meternan prepago. PDR den parlamento a base di un propuesto alternativo di Democracia Real, a reserva 100 mil florin pa esaki. Segun sr. Bikker, ora nan bin cu amiendanan, gobierno adopta esakinan y nan a wordo aproba pa parlamento, gobierno mester ehecuta tambe e mandato cu el a haya mas pronto cu ta posibel. Esaki lo beneficia e pueblo pa introduci e meternan aki mas pronto cu ta posibel.