Mientras Dowers ta sigui sconde, ex minister di Husticia Rudy Croes a mustra cara

Mientras Dowers ta sigui sconde.. EX MINISTRO RUDY CROES A MUSTRA CARA Diahuebs merdia ex ministro di husticia señor Rudy Croes a reacciona riba e situacion hopi alarmante y preocupante cu tin relaciona cu criminalidad cu ta azotando nos isla. Ministro Dowers ta sigui sconde tras di argumentonan sin base y hopi cuestionable cu ta culpa di Rudy Croes cu den pasado y te awe tin tanto criminalidad y cresciente riba e isla. Pa cuminsa mester menciona cu e criminalidad cu tabata tin durante cu Rudy Croes tabata ministro di husticia tabata algo hopi manehable y riba dje ex ministro di husticia Rudy Croes a demostra cu accion y hechonan con pa combati criminalidad. Durante un entrevista ayera na Radio TOP FM 95 ,Rudy Croes a sa di menciona sistematicamente un cantidad grandi di accionnan y cambionan cu el a introduci y haci durante cu e tabata ministro encarga cu husticia. Dowers di otro banda durante cu e tabata den oposicion no por a haci nada otro cu critica sin base ministro Rudy Croes y ora cu menos el a kere, el a haya su mes cu e cartera di husticia unda cu e ora ey e mes mester a bay demostra cu supuestamente e lo tabata por mihor. Rudy a menciona ayera e proyecto di Radar, proyecto di Warda Nos Costa, Helicopter, Proyecto di Imigracion, Proyecto pa seguridad, vigilancia y control den y na KIA, proyecto pa cuida y vigila edificionan y propiedadnan di gobierno, proyecto di cacho pa yuda combati narco trafico, intercepta placa cu asistencia di cacho, a paga balente menos placa pa haya cachonan bon getrain for di Curacao mes compara awor cu a cumpra cacho carisimo na Hulanda, proyecto pa haya asistencia di SKS di Curacao, proyecto pa laga Imigracion haya e mesun nivel cu Marechaussee di Hulanda, un Plan Real pa Cuerpo Policial y asina por sigui menciona. Rudy tabata tin te hasta e grandesa pa menciona sin kita, sin pone cu tabata tin proyectonan cu Watty Vos a laga atras y cu tabata bon y e como ministro di husticia a tuma esakinan over y ehecuta nan tambe y unda cu tabata necesario a adapta y mehora nan pero Rudy a duna credito na Watty. Esaki no por wordo bisa di esnan cu awor ta den gobierno pasobra tur loke cu Watty a bin cune, nan mes a para y kibra y riba dje nan no tin e grandesa tampoco pa admiti e logronan grandi di ex ministro Rudy Croes. Ayera pueblo a djis haya un tiki informacion di kico tur a tuma lugar bao di e gobernacion di MEP pa loke tabata trata husticia, pa asina cada ken por wak e diferencia cu ultimo 3 aña di gobernacion di AVP. Radar a wordo elimina y te awe ni Dowers y menos Mike Eman por hustifica na pueblo pa kico nan a kita e radar. Warda Nos Costa tambe a wordo para y asina ilegalnan tin man liber pa haci y deshaci y esaki tambe ta algo cu te awe e gobierno di Mike Eman no por splica na pueblo. Boa di e gobierno di MEP tabata tin accion y plan pa baha e cantidad di arma di candela cu tabata tin den circulacion y durante ultimo tres aña bao di AVP e cantidad a subi drasticamente y esaki a bay mano a mano cu e cantidad di aumento di atraco y asesinato. Pueblo di Aruba a haya di tende ayera con impactante y desastroso e maneho di Dowers ta compara cu e maneho cu Rudy Croes tabata tin. Te hasta hopi polis awor numa a bin realisa cu durante cu Rudy Croes tabata ministro encarga cu polis, cos tabata mil biaha mas mihor cu e desaster cu ta reina awor den Cuerpo Policial. Anto ainda Dowers ta kere di por tin cuero di cara pa bay critica ex ministro Rudy Croes? Laga Dowers bay radio y menciona e lista largo di su logronan riba tereno di husticia! Ni un plan pa husticia y menos pa Cuerpo Polcial e no por a presenta durante di 3 aña di sinta dushi riba e stoel di ministro, viaha rond mundo y cana cu boshi di marioneta di prensa cumpra pa saca su foto manera modelo. Laga e marionetanan di AVP bay grita manera alma malo numa na radio pa defende nan ministronan mediocre pero hecho ta cu un biaha mas un ex ministro di MEP ta bin pa dilanti pa mustra cara y defende y informa pueblo debidamente, siendo cu esnan cu awor ta riba e stoel di gobernante ta sigui sconde tras di culpamento di e gobierno anterior y manera cos bira un tiki cayente nan ta bula den avion pa desaparece pa algun dia te ora cu cos calma bek. Sent from my BlackBerry