Mester keda vigila e economia ta keda draai

Sra. Magaly Brito di SEPPA ta kere cu APFA ta birando poco poco mas stabiel. Despues di e golpi cu APFA a haya na 2011 ta kere cu SEPPA tin un bon entendimento cu APFA y tin encuentronan regular riba e situacion di e fondo y unda por intercambia di pensamento riba e fondo aki. Diabierna SEPPA a reuni cu APFA y aki a papia di e Hunta di Directiva nobo. Desde 2011 APFA ta cay bao supervision di Banco Central y e rekisitonan ta un poco mas pisa cu antes pa loke ta e candidatonan. Tin preocupacion riba e hecho cu no tin tur momento cu e sindicatonan por reuni cu e representantenan di e sindicatonan ya cu ta reina e pensamento cu nan mester defende solamente e fondo y esaki no ta completamente berdad. Mester tin un cierto secrecia y esaki SEPPA no ta contento cune ya cu esaki no ta cuadra cu e espirito di e discucionnan cu a tuma lugar prome cu 2005 ora cu na 2005 a bin cu Stichting APFA. A haya e cifranan di e fondo y SEPPA ta contento di mira cu tin adelantonan chikito cu ta mustra cu nan ta canando den bon direccion pa asina sali di e situacion critico cu tabata aden. Spera cu esaki sigui den 2013 y mas lew y cu esnan cu ta hinca placa aden por haya esaki na momento cu nan bay cu pensioen tambe.E placa cu Gobierno y otro dunadonan di trabao mester contribui cune ta cumpliendo cune apesar cu ainda tin discusion riba e acuerdo di ehecucion cu Gobierno mester encamina e caminda pa Parlamento pa asina por duna garantia pa APFA. Unabes esaki ta tras di lomba por bisa cu tur cos ta na su lugar. E unico cos cu mester keda vigila ta cu economia ta keda draai y inversionnan tanto local como internacional lo keda duna e rendimento necesario pa cumpli cu loke e fondo ta rekeri.