Mensahe di fin di a

Dentro di un par di ora aña 2012 ta yega na su fin y nos ta yama aña 2013 un bon bini. Na vispera di e aña nobo aki laga nos traha tempo pa reflexiona riba locual e aña tras di lomba a significa pa cada un di nos.

Ban celebra nos logronan y haci e compromiso cu nos mes pa drecha locual a bay menos bon den 2012. Ban fiha nos metanan pa 2013 y haci e empeño necesario pa logranan den e aña nos dilanti. Ban disfruta den ceno familiar y di amistad e hecho di por tabata conta den 2012 cu e cariño y e amor cu nan ta brinda nos. Ban celebra e venida di e aña nobo cu moderacion pa asina evita cu nos por habri e aña nobo cu un tristesa na nos curason. Ban gradici Dios y Pidi’e Su bendicion pa 2013 por ta un aña prospero pa cada un di nos.

Mi kier gradici di curason mi famia, amistades, sostenedores y e gran famia di Movimiento Electoral di Pueblo pa nan apoyo y sosten den 2012. Mi ta agradecido pa e honor di a wordo elegi como Woman of the Year 2012 y ta pone mi dilanti pa den 2013 sigi cu e trabou parlamentario di representa y informa e Pueblo di Aruba debidamente.

Ta mi mas sincero deseo pa e Pueblo di Aruba por pasa un felis cambio di aña den compania di nan sernan keri. Bon Aña!

Xiomara Ruiz-Maduro