Mary Joan Foundation – Santo Sacrificio di Misa diasabra 6 di October na Misa Santa Anna na Noord

Manera ta tradicion di tur aña, Mary Joan Foundation Aruba lo tin su Santo Sacrificio di Misa pa asina duna support na Cancer na pecho pa asina habri e luna di October. Mundialmente luna di October ta e luna pa concientisa mas ariba e cancer di pecho na Aruba. E Santo Sacrificio di Misa aki tur aña ta wordo celebra na un bario diferente y e biaha aki a toca turno pa e bario di Noord. E santo Sacrificio di Misa aki lo tuma lugar diasabra awor dia 6 di October cuminsando pa 7’or di anochi. E motibo di e Santo Sacrificio di Misa aki ta pa conmemora tur cu ta wordo confronta cu e malesa di cancer di pecho, pa esnan cu a bay laga nos y pa tur esnan cu ta pasando actualmente den tratamentonan pa cu e malesa aki. Comunidad di Aruba ta cordialmente invita pa e Santo Sacrificio di Misa aki y asina ta mas conciente di e malesa aki cual ki ora cu ta por bati na bo porta. Ta bon pa keda educa bo mes ariba e risiconan y tambe pa biba un bida mas saludabel. Pa tur esnan presente lo tin un strik roos cual por wordo bisti henter e luna di October. Esaki ta un simbolo di apoyo pa cu e lucha contra e malesa aki y pa por haya un cura pa e malesa aki. Tambe e ta un simbolo di apoyo pa Mary Joan Foundation por sigui yuda tur esnan cu bari na su porta cu mester ayudo. Por haya informacion despues di e Santo Sacrificio di Misa na e mesa cu lo bay tin cu tur informacion necesario.