Reglanan relaciona cu e kavelnan riba L.G. Smith Boulevard
User Rating:
/ 0
- Details
- Category: Local
Departamento di Obra publico ta trece na atencion di pueblo di Aruba en general pero specialmente na e personanan di cual nan nomber a sali pa por bin na remarca pa haya un kavel banda di e ruta di carnaval cu den e fin di siman venidero e caha na DOW lo ta habri pa por paga pa uzo di e tent cu lo ta riba e kavelnan den L.G. Smith Boulevard.
Manera ta conoci e aña aki no lo ta posibel mas pa pone un trailer of algo cu tin similaridad cu un trailer riba e kavelnan den L.G. Smith Boulevard. Gobierno mes lo percura pa pone tent riba e kavelnan y no ta permiti pa pone un otro tipo di tent.
Gobierno mester a haci gasto pa e tentnan. Pa e motibo aki lo mester paga un suma pa uzo di e tent. Pa por haya e permiso di DIP pa tin un kavel lo mester demostra un documento cu a paga pa uzo di e tent. E suma pa uzo di e tent pa e periodo di carnaval lo ta Afl. 200,- y lo mester paga esaki na DOW.
Tanto diasabra dia 28 como diadomingo dia 29 di januari e caha na DOW lo ta habri .
Tin algun condicion mara na uzo di e tent manera cu no por haci barbecue bou di e tent y no por colga propaganda na e tent.
Lo cuminsa instala e tentnan dia 6 di februari.
