Increibel con AHATA por a firma un protocol asina

Durante un conferencia di prensa di partido MEP, sr. Eddie Briesen ta comenta riba un protocol cu a wordo firma 1 di November cual no ta bay den detayes riba dje pero si kier bay un rato riba locual cu nan a pone cu e minister president di Aruba ta bisa cu e medidanan aki ta toca turista so. No ta compronde con AHATA por a firma algo asina. E protocol aki ta e cambionan di belasti g cu ta na caminda. Manera Hulanda mes a bisa cu Aruba mester fasten seatbelts pa e medidanan cu ta biniendo na caminda. Locual cu a laga sr. briesen asombra ta cu gremionan y particularmente AHATA por a firma un documento asina aki cual segun sr. Briesen e falta contenido y seriedad. Paso nan ta papia di con nan ta bay mehora e cartera di e ciudadano dus mehora e poder di compra y berdad nan mes ta bisa cu tabata tin hopi cosnan negativo pa e poder di compra. Nan mes ta duna di conoce cu e medidanan cu nan a bin cune a corta pisa den e cartera di e ciudadano. A papia di reparatie toeslag, nan kier bay hisa AOV pero esey lo no bay mucho riba nan awor. Ta bay riba e belasting ervorming, tin un grupo ta traha riba e reforma fiscal. Nos por wak cu ora nan bay riba turismo cu e minister di turismo ta bisa cu Valero ta sera. Esaki ta danki na Mike and Mike cu a sera e refineria y nos por wak cu turismo practicamente ta na 80% of kizas mas di nos economia. Anto net e unico cu a keda cu ta genera entrada pa nos, esey nan a mata. Ja cu a mata pueblo caba, kier mata turismo awo. Entrante 1 di maart otro aña lo tin un milieu heffing riba tur e rental cars nan. Nan lo bay paga 1 dollar pa dia pa cada auto. Dia 1 di November 2013 e ta bay riba tur esnan cu tin e “O” y e “T” dus e toursnan y nan no ta cuantifica kico esaki ta y ki impacto e tin. A bin riba un otro milleu heffing dia 1 di maart 2013 riba e time share resort nan y 10 dollar ta bay riba cada studio dus si abo tin un studio lo bo tin cu paga 10 dollar mas. Si bo tin un apartment, bo ta bay paga 15 dollar mas y si bo tin mas camber bo ta bay paga 25 dollar. Practicamente mayoria di nan ta mas camber dus gran parti di e time shares nan ta bay paga 25 dollar mas anto despues di un aña nan ta bay evalua pa wak kico ta kico. Esaki ta un gobierno pret, e no ta cuantifica cuanto e medida ta bay costa bo, bo ta hisa benta riba e turistanan anto despues di un aña bo ta wak si e ta bariga geblaas pia den laira dus si e ta morto of bibo. Un gobierno irresponsabel so por haci esaki. E otro ta cu otro aña dia 1 di maart nan ta bin cu un otro milleu heffing di tres dollar pa cada camber. Dus cada camber cu bin cu ta ocupa bo ta bay paga 3 dollar aserca riba e hotelnan regular cu no ta cay bao e parti di time share. Esaki tampoco nan sa kico e ta bay ocasiona dus cuanto e ta bay ta ni kico ta su impacto. Despues di un aña nan ta bay wak si e turista ta bibo den camber si of no. ta increibel con AHATA por a firma algo asina, segun sr. Eddie Briesen.