Gobierno no ta haci nada pa resolve e problemanan nos dilanti

Sr. Eddie Briesen no ta compronde con gobierno ta bisa cu e medidadnan lo no tin consecuencia pa e pueblo. E rapport di Banco Central di 2011 ta bisa cu e medidanan a pone cu e productonan relata na turismo a aumenta den prijs cu 1,3%. E gobierno aki no kier papia di gastonan pero solamente kier papia di entrada adicional. Incomprendibel con gobierno por bisa cu nan no sa kico ta bay pasa una bes nan introduci medidanan. Kier tira un machete den turismo, pero kier warda te otro aña pa mira e consecuencianan di e medidanan. E gremionan y AHATA ta full comodo. Antes AHATA tabata tin un presupuesto di tres pa cuater miyon den nan portofolio pa haci mercadeo pa Aruba. Awo nan tin 76 miyon den caha di gobierno pa haci y deshaci cu mercadeo. Pues nan no ta saca placa di nan mesun fondo pa yena nan negoshinan. Dimes nan ta keda boca sera e ora ya cu nan no ta gasta nan mesun fondo. Anto e ora ey e pregunta ta: “Ken ta enriquece ken?” Te ainda no ta compronde cual direccion e gobierno ta tumando. E rapport di Banco Central a menicona siete punto. Valero a sera, Aruba no tin diversificacion, costo di bida ta sigui aumenta, e poder di compra ta bay cada dia mas atras, e pueblo ta enveheciendo cual ta pone presion riba AZV y SVB. Gobierno no ta papia di gasto pero solamente di entrada. Di otro palabra, no ta mira e gobierno aki haci nada pa resolve e problemanan nos dilanti y pa dia cu gobierno dicidi pa haci algo ya lo ta hopi laat, segun sr. Eddie Briesen.