Gabinete Eman mester stop cu manipulacion y mentira!

Promer Ministro Mike Eman por splica pueblo cual ta e di dos pilar economico di Aruba na e momento aki?
Ta increibel con e gobierno actual kier sigui manipula mente di pueblo y ta sigui trece padilanti un gran cantidad di mentira cu nan mes no ta kere den nan. Un di e mentiranan cu a ser vocifera siman pasa door di Promer Ministro Mike Eman ta cu ‘su gobierno ta den proceso pa crea un di tres pilar economico pa Aruba’. Sinembargo tur hende cu sano huicio ya ta na altura caba cu – despues cu Gabinete Mike Eman a logra sera e refineria Valero na November 2012 – nos pais a keda sostene riba un solo pilar economico, cual ta nos industria di turismo. Por lo demas – na e momento aki – Aruba no tin ningun otro pilar economico cu ta duna nos e derecho pa for di awor caba papia di un di tres pilar economico, pues Mike Eman a salta completamente e di dos pilar economico. Ta pesey ta increibel con leu e manipulacion di e gobierno actual ta bay door di papia awor riba creacion di un di tres pilar economico.
Locual ta haci e asunto aki mas tristo ainda ta cu un compania renombra manera Ernst & Young tambe a bay den e racha di manipulacion y mentira y awor tambe ta papiando di ‘Aruba su di tres pilar economico’. Esaki ta un compania cu supuestamente mester conseha y traha rapportnan profesional pa gobierno y ta menciona sorto di barbaridad asina.
Lo ta na su lugar pa Promer Ministro Mike Eman y e compania Ernst & Young – promer cu nan sigui papia di creacion di un di tres pilar economico – splica pueblo cual ta e di dos pilar economico cu nos pais ta conta cune na e momento aki. Laga nos spera si cu nan lo no bin cu e storia di ‘green energy’, ya cu esaki no a trece ningun entrada extra pa caha di gobierno, pero solamente gastonan miyonario pa nos pais paga, manera entre otro tur e 3 conferencianan berde, Al Gore, e bootje di Wubbo Ockels di 300 mil Euro (800 mil florin), huur di edificio di TNO di 360 mil florin pa aña, contracto cu Carbon War Room etc. Tambe e locura di e Tram den e cayanan di Oranjestad no por wordo considera como un di dos pilar economico pa Aruba y pa no papia mes di e exploracion di petroleo y gas den nos subsuelo.
Finalmente, nos gobernantenan mester cuminsa bira mas serio y no mester trata di manipula mente di pueblo, keriendo cu pueblo no ta compronde tur nan astucia y mala mañanan.