Fundacion OANSA ta haya check di Prome Minister Eman pa sigui cu e bon trabou pa comunidad

Siman pasa Prome Minister Mike Eman a haci entrega di un check na e grupo di mucha y hoben Cristian OANSA na Piedra Plat. E grupo aki ta consisti di 80 mucha y hoben entre 4 pa 16 aña cu ta wordo guia pa 23 boluntario. OANSA ta un fundacion conoci mundialmente pa e trabou cristian cu e ta desplega. OANSA ta realisa su metanan pa medio di un programa cu ta basa riba e iglesia local of institucionnan cu ta traha cu mucha y hoben. Banda di deporte e muchanan ta haya les den norma y balornan for di e pensamento cristian. “Pasobra muchanan ta importante pa Dios”, ta e lema di OANSA.

Algun siman pasa a wordo teni un wega di softball na honor di Prome Minister cu a carga su nomber tambe. Aki a recauda fondo cu a wordo entrega na Prome Minister cu e mensahe pa e na su turno entrega esaki na un fundacion of un otro institucion cu ta haci obranan di caridad na Aruba. Despues di a wak rond a scoge pa haci e donacion aki na OANSA na Piedra Plat pa e hopi trabounan comunitario cu e fundacion aki ta haci.

Prome cu entrega di e check, e hobencita Kayle Figaroa cu su bos angelical a haci un oracion cortico pa Prome Minister Eman. El a pidi bendicion di Dios p’e y a gradici pa su presencia eynan. Tabata un momento masha sereno y bunita. E hoben Yustin a tuma e check di man di e prome mandatario.

Prome Minister Eman a bisa cu durante e presentacion cu el a haya di e trabou cu OANSA ta haci el a keda hopi impresiona cu e diferente programanan. “Mi a mira con ta yuda muchanan cu nan huiswerk, con ta hiba combersacion cu muchanan un poco mas grandi riba norma, balor, stimacion pa otro, con pa cuida esnan cu no tin suficiente entrada, cos mester resa na Papa Dios pa e guia nos den nos bida”. Prome Minister Eman a splica con gobierno di su parti ta trahando pa trece mehoracion den e barionan, drecha scolnan, pone luz unda mester y tambe crea luganan di hunga pa e muchanan. “Loke cu hopi bes nos ta mira cu ta haci falta ta lidernan pa yuda den e trabounan aki. Loke OANSA ta haci ta hustamente trece e pensamento di servicio aki for di chikito caba den curason di e muchanan. Nos ta aprecia e trabou di OANSA y p’esey tambe nos ta aki pa mira y sostene boso trabou y brasa tur e hobennan y bisa nan cu nan ta riba e bon caminda”.

Dirigentenan di OANSA tabatin palabranan di danki tambe pa Cede Aruba cu a yuda nan hopi bon financieramente.