Dr. Horacio E. Oduber Hospital ta reconoce y otorga regalo na Mama di aña

Diadomingo Dr. Horacio E. Oduber Hospital y specialmente Departamento di Maternidad tabata di fiesta paso a duna pa prome biaha reconocimento na e Mama di aña cu ta e prome mama cu ta duna luz riba Dia di Mama. Un celebracion sumamente bunita na momento cu Mama Chastity Kamp y tata Marshall Marval ta mira yegada di nan prome yiu Lyrienne Marval.

Pa exactamente 4or di marduga e mama ta drenta Hospital cu dolor y pa 5.05 di marduga baby Lyrienne ta nace sano cu un peso di 2690 gram y largura di 48 cm. Den presencia di Partera Shaline Tromp y enfermera Judelly Zavala y Magaly Arends conhuntamente cu Renita Blindeling, Manager di departamento Maternidad y tambe Charlaine Huntington, Funcionario di comunicacion di Hospital a haci entrega di un bunita “Flip figital videocamara”. Un regalo sumamente interesante mirando cu diariamente un baby ta haci movecion of expresion nobo cu siguramente ta bunita pa recorda y di ki miho manera cu un camara pa filma.

Hunta di Directiva, staf y personal di Hospital ta manda un pabien grandi pa e pareha Marval – Kamp cu yegada di nan baby Lyrienne y alabes kier desea ainda tur mama na Aruba y tambe trahadonan di Hospital un Feliz dia di Mama.