Doño ta reakshoná riba deklarashonnan di Hyatt Hotèl ta den operashon, ku tur hende na trabou i kumpliendo ku tur reservashon.

Awe e grupo di invershon hotelero Santa Barbara Hospitality N.V. a reakshoná riba deklarashonnan engañoso di Hyatt Corporation i Hyatt Curaçao NV (‘Hyatt’) – i el a informá e wéspetnan i esnan interesá den komunidat di Kòrsou ku e hotèl bou di e nòmber nobo Santa Barbara Beach & Golf Resort Curaçao ta ful den operashon. Ta kumpliendo ku e reservashonnan na e proyekto hotelero luhoso aki di Kòrsou, ta yama bon biní na wéspetnan nobo i e hotèl ta funshoná ku su mes hendenan. Dia 21 di novèmber último e doño a suspendé e konvenio di maneho ku Hyatt i djasabra el a apuntá Benchmark Hospitality International (‘Benchmark’) pa operá e hotèl. “E hotèl ta honra e reservashonnan hasí i ta yama un kordial bonbiní na bastante bishitante nobo”, David Maxfield ta bisa; e ta representá Santa Barbara Hospitality N.V., doño di e hotèl. “E doño ta haña ku el a aktua a base di su derechonan legal konforme e konvenio di maneho pa terminá e relashon ku Hyatt i nos ta anhelá pa saka lo máksimo for di e potensial di e hotèl aki bou di un gerensia nobo.” Representantenan di e doño a tuma e kontròl operashonal i finansiero di e hotèl di 350 kamber aki alrededor di mitar di un, ora lokal, di djasabra mardugá pa evitá kualke inkonbeniensia pa e wéspet i empleadonan. “Despues ku e hotèl a sufri durante mas ku dos aña bou di un presunto mal maneho i pèrdida finansiero kuantioso, e invershonistanan no tabata ke sigui karga e gastunan bou di maneho di Hyatt,” Maxfield ta bisa. “Bou di e sirkunstansianan aki e doño ta kere ku a ked’é únikamente dos opshon – sera e hotèl aki ku na kumpliendo i posiblemente pone 400 hende riba kaya, òf remplasá Hyatt pa un kompania nobo pa hiba e maneho.”