Doño di trabao mester respeta ora empleado no por traha overtime

Nos a compronde for di sr. Franklin Kock di Departamento di labor cu sa pasa cu ta abusa di e derecho di trahador door di laga e trahadornan traha pa oranan extra sin pago of ta compensa nan cu dia liber. Actualmente ta asina cu ora un doño di trabao kier pa su trahadornan traha overtime, e mester pidi permiso na Departamento di Labor, specialmente si nan salario ta alrededor di 2685 florin pa luna. Na momento cu haya e permiso aki, e doño di trabao mester pidi e trahadornan si nan kier coopera cu su petishon. Si en caso e trahador tin un bon motibo cu esaki no por, e doño di trabao mester respeta esaki tambe. Huesnan semper ta balansa e interes di e compania contra e interes di e trahador. Mester mira kico ta e motibonan. Tambe mester realisa cu nunca un doño di trabao lo pidi pa traha overtime asina sin mas ya cu esaki ta costa e doño placa tambe. Overtime ta orarionan extra cu e trahador a cumbini riba e orario cu e ta traha normal. Orarionan extra mester wordo paga extra tambe y na e porcentahe cu ta determina pa ley pa e dia y orario ey. Traha extra ta gastonan extra pa e doñonan di trabao. Pa duna un ehempel, dia 25 y 26 di December ta 200% bes e uurloon bes e cantidad di oranan cu e empleado a traha. E proximo dia di fiesta lo ta dia 1 di januari 2013. Segun e schedule pa 2013, esakinan lo ta e fechanan cu oficialmente nos tur ta liber:
1 Januari, diamars, Aña Nobo
25 januari, diabierna, Dia di Betico
11 februari, dialuna, Dialuna di Carnaval
18 maart, dialuna, Himno y Bandera
29 maart, diabierna, Diabierna Santo
1 april, diamars, Di dos dia di Resureccion
30 april, diamars, Aña di La Reina
1 mei, diaranson, Dia di Obrero
9 mei, diahuebs, Pasco di Asuncion
25 december, diaranson, Pasco di Nacemento
26 december, diahuebs, Di dos dia Pasco di Nacemento
En caso un trahador wordo kita for di trabao paso el a nenga di traha riba un dia di fiesta, por pasa na Departamento di Labor na e Departamento di Conflicto. Eynan e expertonan lo studia si e trahador en berdad a actua debidamente y lo papia cu e doño di trabao tambe. Semper Departamento di Labor lo trata di laga e partidonan jega na otro pero si asina mes esaki no lorga, lo envolve Sociale Zaken den e parti aki pa asina nan haya abogado liber pa nan por bay Corte unda lo balansa e interes di e compania vs e interes di e trahador. Si ta para den contract di e trahador cu e mester traha dianan di fiesta e no por nenga e doño di trabao asina sin mas. Den sector hotelero e situacion ta diferente. Den e sector aki dianan di fiesta por ta dianan normal di trabao mirando cu ta trata aki di un servicio cu mester tuma lugar 24/7. Nan tin otro reglanan cu e Ordenanza Laboral y ta mas flexible. Dia 31 di December y dia 2 di januari ta dianan normal di trabao, pues no ta dianan liber ni dianan di fiesta segun sr. Franklin Kock