Cu ‘hattrick’ di Alex Conceicao: La Fama AruBook-Jads ta supera Caravel diasabra anochi

Diasabra anochi e ekipo di La Fama AruBook-Jads, a logra un triunfo comodo riba Independiente Caravel, ora cu e centro delantero Alexander Conceicao, a anota na tres ocasion pa duna su ekipo e triunfo comodo cu anotacion di 6-0.

E partido a ser domina pa La Fama for di comienso te final caminda La Fama a hunga un di su miho partidonan di e campeonato, cu combinacionnan basa riba velocidad cu no tur ora a bay efectivamente pero cu si tabata suficiente pa forsa Caravel duna mas atencion na defende cu su wega ofensivo.

Ya na di dos minuut di wega caba La Fama ta saca bentaha di 1-0 ora cu despues di un serie di combinacion di bala, Freddy Rodriguez duna un pase di profundidad cu a sorprende e defensa di Caravel y a permiti Alex Conceicao bay rumbo pa gol y facilmente deposita e bala den net pa duna su ekipo e bentaha tempran.

E gol a habri caminda pa La Fama domina e partido den su totalidad, pero mientras cu rato rato e bala tabata circula bon, den e parti final esaki tabata hopi slordig y no a permiti e ekipo yega na mas gol.

Albert Francis tabata hopi peligroso riba e banda drechi pero su centronan no tabata efectivo, mientras cu varios tiro a pasa over of na banda di dol, mientras cu dos a dal den post of tubo di gol.

Dado momento e medio campista Felix Rodrigues Martinez ta los un tremendo tiro di distancia riba gol, pero cu’n reaccion rapido portero Andy de Cuba ta logra di hinca man tras di e bala y pusha esaki over di gol.

E di dos gol di La Fama a bin cay na di 37 minuut di wega ora cu riba otro atake di e ekipo di Savaneta, Alex Concencao kita tres hende for di su curpa y despues deposita e bala den net pa duna su ekipo bentaha di 2-0.

Cu e anotacion aki tambe e prome tempo a bay aden.

DOMINIO TOTAL

Den di dos tempo no a bin mucho cambio, Caravel a medio presiona den e prome minuut pero simplemente no tabata por a impone su wega y La Fama su medio campo a hunga sumamente efectivo y a recupera e ritmo di wega y e defensa di Caravel mes a practicamente regala e di tres gol na su rival.

Un sake di gol cortico na di 52 minuut di wega a wordo presiona pa Alex Conceicao y tabata Gleisson Barros kende ta logra di recupera e bala y pasa mesora pa Bruno Conceicao kende ta los un tiro den skina ariba pa duna La Fama bentaha di 3-0 y practicamente kibra tur Resistencia di Caravel.

E ekipo di Santa Cruz no por a yega na e gol contrario y solamente a bin haya un tiro liber den area penal ora cu e hoben portero Gerald Schwengle a keda cu e bala mucho den su poder pero Caravel no a probecha di e situacion unico aki.

La Fama a sigui domina e wega trahando duro y na di 71 minuut tabata Bruno Conceicao kende for di banda drechi ta pone un centro largo te otro banda y aki Albert ‘Killer’ Francis no ta laga e bala mishi cu tera y ta fusila portero de Cuba pa duna su ekipo bentaha di 4-0.

Tres minuut despues La Fama ta aumenta su bentaha na 5-0 ora cu henter e defensa di Caravel para riba un tiro liber cobra pa Felix Rodriguez y aki Alex Conceicao ta domina cu pecho, kita portero de Cuba facilmente y pone e bala den e gol bashi pa su di tres gol y asina completa su di dos hattrick di e temporada.

E ultimo gol di La Fama a keda anota na di 82 minuut di wega pa Gleisson Barros do Santos kende ta slide e bala den net pa pone e marcado final na 6-0 pa La Fama cu a pasa pa di dos puesto riba e tabel di posicion, cu 36 punto empata cu Britannia pero cu miho averahe di gol.

Alex Conceicao cu su tras golnan a logra acumula un total di 18 gol como maximo anotado di e campeonato.

Caravel ta keda den un situacion sumamente delicado ya cu e ekipo tin 9 punto mientras cu Juventud Tanki Leendert tin 7 punto y ambos ekipo falta un wega ainda pa hunga. Caravel falta su wega contra di Deportivo Nacional mientras cu JTL tin cu enfrenta e ekipo di Riverplate den su ultimo compromiso di temporada.

Na e momentonan aki JTL ta e ekipo cu lo degrada directamente mientras cu tanto Riverplate como Caravel tin cu hunga weganan di promocion y degradacion.