Corsou: Celebracion di dia di Obrero 2012: Skirbi pa Anthony Haile

Manera ya tur aña a bira un custumber dia 1 di mei ta cuminsa e celebracion di dia di obrero den misa di Sta. Famia caminda tanto obreronan como mandatarionan ta acudi. E aña aki no tabata distinto cu e unico diferencia cu despues di e celebracion di misa tur presente a marcha bay edificio di ACU caminda a desvela un busto di reverendo Amado Romer di feliz memoria. E aña aki ta e di dos aña cu pader Amado Romer no ta hunto cu nos mas y mescos cu aña pasa Pastoor Morrison la Porte tabata encarga cu e parti di misa.

Den un predicashi sumamente na nivel y hopi bon hinca den otro Pastoor Morrison a mustra tur e diferente gremio nan presente riba nan responsabilidad cu cada uno tin den nos comunidad. como un bon yiu di tera e tabata sa di haci esaki na un manera decente pero hopi cla. Na Spaño nan ta bisa : “Al buen entendor pocas palabras”.

Un di e aspecto cu Pastoor a dedica tension na dje ta e hecho cu den misa tabata tin hopi hende pero poco hoben. Den e aspecto aki e parti di relevo ta hunga un parti importante. Corectamente e a puntra sindicato con ta para cu formacion di nan miembronan.

Akinan Pastoor a trece un ehemplo di Abraham cu tabata atento na e yamada di Dios y sin pensa dos biaha tabata dispuesto pa sigui tur instruccion cu su Señor a dun’e. Hopi biaha nos tanto den sindicalismo como den gobierno y den empresanan nos ta “settle down” y aki e peliger di mas grandi ta sinta. Nos ta perde e realidad di hendenan cu nos tin cu sirbi. Nos NO tin tempo pa scucha pasobra nos ta hopi druk. Semper bay nos ta super druk y hasta nos ta kere cu locual nos ta sinta ariba ta di NOS y cu ta NOS so por dicidi riba esaki.

Den e parti di ta hopi druk Pastoor a duna un ehemplo di e homber cu tabata core un garetia. Su instruccion tabata pa core e garetia y tabata haci esaki for di mainta te atardi y nunca no por a para pa ningun hende ya e tabata masha druk coriendo e garetia. Un dia un hende a logra stop e y ora e bay wak den e garetia no tabata tin nada sino biento. Ora a puntra e homber ta con bini e tabata core cu garetia bashi su contesta tabata cu ta core e tin cu core e garetia sin importa si esaki ta yen of no. Pastoor a sigui elabora cu lo ta bon pa nos pone nos horea pa scucha otro. E Don sabelo todo nan cu nos tin den nos pais, pidi nan un dia pa pone den practica locual nan ta predica y lo bo ripara cu ta hopi scuma poco chuculati. Pastoor a finalisa bisando tur presente cu nos mester haci manera San Pablo a siña nos pa tin amor pa otro no solamente den nos trabou pero den tur cos cu nos ta haci.

Nos gobernador tambe a hiba palabra y un liña cora cu tabata core den su discurso tabata e dialogo social cu a bay perdi y cu nos mester bolbe reactiva . Nos tin cu cuminsa papia mas cu otro y stop di pone enfasis riba locual ta diferencia nos pero mas tanto locual ta uni nos. No ta facil pa tur hende su cara ta den mes un direccion p’esey e dialogo social ta importante.

Despues di misa mayoria di presente a bay edificio di ACU caminda un bunita busto di Pader Amado Romer den presencia di su famia a wordo desvela. E potretnan ta duna un bista di con e celebracion tanto den misa como e marcha y e develo na edificio di ACU tabata.