Consul Italiano na Cas di Aruba

Recientemente Cas di Aruba a haya un bishita di cortesia di Consul Italiano Laura Calligaro. Minister Plenipotenciario Edwin Abath a tuma e oportunidad pa pone Sra. Calligaro na altura di e desaroyonan actual riba tereno politico y economico na Aruba.

Sra. Calligaro a mustra hopi interes den e maneho di Gabinete Mike Eman, cu apesar di e consecuencianan di crisis mundial, a logra economisa y principalmente a logra inverti den un mehoracion riba e tereno habitabel di e isla. Esaki por ehempel atraves di e proyecto di renobacion y revitalisacion di barionan na Aruba, BoBario. Asina e economia local ta haya e empuhe necesario.

Minister Plenipotenciario tambe a informa Sra. Calligaro tocante e maneho di Gabinete Mike Eman, cu ta consisti di expande economia di Aruba, por ehempel dor di posiciona Aruba como un punto central entre Europa y Sur America. Aki sigur industria y comercio di Italia por probecha di e posicion di Aruba.

Tambe e turismo cu ta bin for di Italia ta hopi importante pa economia di Aruba. Esaki a aumenta considerablemente den e ultimo dos añanan, danki na diferente campaña di promocion cu ATA-Europa a haci na Italia.