Conocido koki di Aruba, Maria Petit ta duna les di cushina na studiantenan di Zadkine College

Un di e kokinan mas famoso di Aruba, Maria Petit, a laga e studiantenan di e centro di educacion regional ‘Zadkine Food & Business” di Rotterdam cera conoci cu e secretonan di e cushina di Aruba, e Cushina Crioyo. Observa pa Minister Visser kende ta hacienda un bishita di trabou na Hulanda y Minister Plenipotenciario Edwin Abath, Maria a siña e studiantenan con pa traha entre otro pastechi y Ponchi Crema. Den esaki el a wordo asisti pa Nico van der Meer, kende ya pa 18 aña ta docente na Zadkine College. Prome cu esaki el a biba y traha di 1985 te 1994 na Aruba. E tabata traha den e cushina di Manchebo Beach Hotel y Chez Mathilde. Tambe e tabata duna les di cushina na empleadonan di Lago cu dor di e ciere a perde nan trabou.

Maria Petit ta conoci na Aruba di television, su buki di cushina, su dvdnan y di su presencia den Superfood na unda e ta ofrece clientenan ‘hapjes’ cu e ta traha eynan. Restaurantnan na Aruba cu kier amplia nan clientela regularmente ta haci un apelacion riba Maria. ‘Maria Ta Den Cushina’ ta un expresion conoci na Aruba cu ta indica tambe cu unda Maria ta den cushina no ta keda un mesa bashi. Aunke cu Maria ta na Hulanda pa bishita famia, e no por keda sin haci promocion pa e cushina di Aruba. E tabata mesora masha entusiasma ora cu Abath a lanza e idea pa e duna un workshop. E studiantenan a siña masha lihe. Maria tabata satisfecho cu nan

dedicacion y sigur lo tira un boca di palabra pa nan si nan dicidi di busca un lugar pa core stage na Aruba. Actualmente tin 23 studiante di Zadkine College cu ta core stage den e parti Caribense di Reino. E cushina Arubiano ta conoci pa su stobanan sabroso, su funchi, keshi yena, pastechi y sin duda tambe pa su diverso platonan di lama. Pa chikito cu Aruba por ta, e isla cu su mas di 200 restaurant, ta aparte di ta e lugar ideal pa gosa di un solo cayente, un lama cristalino cu beachnan blanco, ta tambe un paraiso pa esnan cu kier saborea un cuminda delicioso.

Zadkine

Zadkine ta un di e centronan di educacion di enseñansa secundario mas grandi di Hulanda. Na Zadkine College ta unda profesionalnan ta wordo forma y studiantenan ta wordo prepara pa tuma un posicion activo, independiente y cu hopi perspectiva den comunidad. Gran parti di esaki ta sosode den practica. Dunadornan di trabou, negoshi y institutonan den region ta wordo aserca pa ta parti di esaki. E ambicion di Zadkine ta pa ofrece un miho educacion profesional y mas efectivo. Zadkine ta sostene studiantenan ora cu nan mester di extra ayudo y pa medio di deporte y cultura amplia nan horizonte. Pa preguntanan encuanto Zadkine Food & Business por tuma contacto cu Fleur Miermans na telefon 06 – 467 12 206 of mail f.miermans@zadkine.nl

Related posts

Leave a Reply

Your email address will not be published. Required fields are marked *


*