Brazil Taekwondo Stichting a tene un reunion importante na Centro di Bario Brazil

Diahuebs anochi, Brazil Taekwondo Stichting a tene un reunion importante pa tur su miembronan na Centro di Bario Brazil. Miembro di directiva, Sr. Robert Giel a dirigi e reunion unda cu a discuti e diferente puntonan di agenda.

E prome punto tabata e car wash cu a wordo teni dia 10 di juni, aki a laba 56 auto, mientras 187 ticket a wordo bendi. Después a reparti carchi pa e siguiente car wash cu lo ta dia 8 di Juli na Centro di Bario Brazil. A papia tambe ariba e entrenamento p’afo di e weekend venidero, lo busca tur atleta bou palo di Misa di Brazil pa despues transporta nan pa Babi Beach. Un campo di entrenamento programa a cambia di fecha, esaki a bira awo di 13 pa 15 di juli na Landhuis Rojer.

Notable ta cu lo bay tin algun campeonato interesante na caminda pa e atletanan.

Dia 18 di juni tin e 3rd Club Kampioenschappen, mientras e examen ta bay ta dia 25 di juni unda cu esaki lo cuminsa for di 5′or pa tur color di faha. E campeonato di Aruba Caribbean Cargo lo ta dia 7 di Juli, esaki ta e ultimo clasificacion pa e Best of the Best cu lo bay ta 1 di September 2012 den Centro Deportivo Betico Croes. E aña aki, e Best of The Best ta conta cu participacion grandi for di exterior especialmente for di Merca.

A evalua e campeonato organisa pa San Nicolas Taekwondo Center den su totalidad. Directiva den un forma interactivo a discuti si lo permiti scopnan pa cabes den tur edad pa loke ta e resto di campeonatonan cu Brazil Taekwondo Stichting lo organisa.

Por ultimo, Brazil Taekwondo Stichting ta preparando pa bay participa na e Open di Caracas, Venezuela e dianan 4 y 5 di augustus, unda cu lo biaha cu un equipo di aproximadamente 6 atleta. Lo mester bay recauda fondo pa realisa e biahe aki. Na e turno liber a bin p’adilanti: Bus, calendar 2013 y Best of the Best.