Boston Red Sox cu 3 victoria den fin di siman contra Tampa Bay Rays

Durante fin di siman a tuma luga weganan di baseball di Grandes Ligas, tur ekipo a mira accion durante fin di siman, pero ekipo cu mas a capta e atencion ta ekipo di Boston Red Sox, cu no a cuminsa e campeonato cu bon pia, pero e fin di siman aki si a demostra cu nan ta keda un ekipo fuerte.

Diadomingo merdia a tuma luga e di tres wega entre ekipo di Boston Red Sox y Tampa Bay Rays, ekipo di Red Sox a logra 2 victoria caba na e momento ey y tabata bayendo pa di tres victoria consecutivo.

Ekipo di Boston Red Sox a presenta cu su pitcher habrido kende ta Felix Doubront mientras cu Tampa Bay a presenta cu Matt Moore.

E wega aki sigur tabata uno di toma y dame, caminda cu Boston Red Sox ta bay ariba cu score di 3-0 den bom di 2 inning y ta score 1 careda mas den bom di 4 inning, ekipo di Tampa Bay no a keda atras y den cabez di 5 inning ta score 3 careda pa corta bentaha y ta empata e wega na 4 careda den cabez di 6 inning.

Despues di esaki, Boston Red Sox ta piki 2 careda mas y asina ta logra bay cu e victoria cu score di 6-4.

Ekipo di Boston Red Sox a score 6 careda, a bati 8 hit y no a comete eror.

Pitcher ganado a resulta Vicente Padilla, mientras cu miho batiadonan a resulta David Ortiz cu a bay di 4-3 y Cody Ross cu a bay di 2-1.

Pa ekipo di Tampa Bay Rays, a score 4 careda a bati un total di 13 hit y no a comete eror.

Pitcher perdedo a resulta Matt Moore, miho batiadonan a resulta Shauw Rodrigues cu a bay di 4-2.