ATRACO RIBA BANCO A DEMOSTRA; GOBIERNO NO POR GARANTIZA SEGURIDAD DI PUEBLO MAS
(Solo di Pueblo) Ta kico mas tin cu tuma lugar riba e pida baranca aki pa pueblo realisa cu e gobierno di Mike Eman no tin derecho pa keda ni un solo seconde mas den gobernacion?
Mientras parlamentarionan di AVP mano a mano cu un boshi di bochinchero di AVP sinta riba tribuna di Parlamento tabata comportando nan mes manera hendenan den un pelea cayehero, atracadornan tabata haci fiesta cu atraco riba banco.
E proyecto di Urirama unda cu gobierno di Mike Eman cueste loke cueste kier bay hinca pueblo den debe di miyones, ta mas importante cu seguridad di pueblo.
E atraco cu tuma lugar ayera riba un banco di RBC na Noord, a pone cu tur banco a dal porta sera di inmediato y lo habri bek te dialuna proximo.
Pa prome biaha den historia cu algo asina impactante a tuma lugar, unda cu un atraco cu riba su mes no tabata devastador (danki Dios!) a pone cu tur banco mester a wordo sera di inmediato.
No tabata trata di un atraco unda cu tabata tin bashamento di bala y cu hende a keda herida of muri.
Pero e solo hecho cu tur banco a dicidi cu ta dal porta sera, esey tabata un señal bon cla y raspa den direccion di gobierno di Mike Eman, cu banconan no ta confia gobierno mas riba tereno di seguridad en general.
Banconan no por depende mas riba gobierno di Mike Eman y ministro di husticia Dowers pa seguridad di personal di banco y nan clientenan y esey a keda demostra Diabierna merdia cu e accion relampago di tur banco pa sera porta te dialuna.
Si banconan mes no ta confia gobierno mas pa percura pa seguridad en general anto ta ken si por sigui confia gobierno di Mike Eman?
Den Parlamento 12 marioneta di fraccion di AVP Plus tabata ocupa pa tira un atraco riba placa di pueblo cu e proyecto di Urirama y pafor di Parlamento atracadornan tabata sigui e ehempel di gobierno.
Na final di dia ta pueblo a sali atrobe malamente perhudica pasobra ta con tur hende cu tabata tin mester di placa pa cumpra cuminda durante fin di siman mester a haci?
Awor mas cu nunca mester bin un accion relampago pa manda e gobierno di Mike Eman y Dowers cas pasobra asina aki cos no por sigui mas.
Diabierna tabata banconan cu mester a dal porta sera; mayan ta cua instancia ta na buert?
Aeropuerto di Aruba tambe lo wordo sera te dialuna si riba un diabierna un atraco wordo haci eynan?
Gobierno di Mike Eman a demostra cu nan no por garantiza seguridad di e pais aki mas.
Trackback from your site.
Comments (7)
Buchi
| #
awor cu e caso ta resolvi , a gara e sospechosnan !!! danki na e trabou di nos autoridadnan …despues di a critica dowers y habri bosnan gal riba gobierno di AVP….ki bo ta bai bisa awor??? bo ta bai bisa danki na e bon trabou di nos cuerpo policial ??? y e ta cai bou di Dowers toch??? esaki ta demostra con boso medio ta blo sinta critica pa critica !! awor cu e ta soluciona…ki bo tin di bisa awor!! ???
Reply
Well well
| #
Sigur cu nan no ta duna elogio na KPA ni su minister pasobra e meta di e medio aki no ta pa raporta noticia. Ponencianan manera e titular di e pida aki ta sirbi solamente pa hinka idea den cabes di esnan cu mente turdi cu ta pasa nan dianan ta wak con otro ta traha pa nan mes y pa ta un aporte na e communidad aki, pa nan pasa man pa sodo di otro enbes di bay traha nan tambe. E hendenan aki asina ta influencia pensamento di e tiponan aki pa maldad solamente. Dios lo saca tur mal intencion na claridad pa tur mira. Nan mes lo reda nan mes.
Reply
bUCHI
| #
DOOR DI SOLUCIONA ESAKI A KEDA DEMOSTRA : GOBIERNO POR GARANTIZA E SEGURIDAD DI PUEBLO!!! DANKI! esey mester ta bosto titular!!
Reply
bos di pueblo mester sigi resona
| #
Esey ta un di e tantisimo cu tin ainda panan resolve puntra si ta mep eta of pakiko tin asina hopi atraco den e ultimo tres anjanan ,bon trabow na e cuerpo policial cu ta traha a base di informacion i tips cu pueblo ta suministra na autoridad local awor minister mester zorg pa laganan for di riba caya pa basta tempo .
Reply
Well well
| #
Ta esei pueblo mester hasi denuncia y raporta maldad. Segun e mentalidad tras di e titular aki minister su so mester por sa ki dia y ki ora esnan meimei di nos lo tin pensa di hasi nan maldad. E minister ni e gobierno aki no ta sinta cu nan bao palu of unda cu ta cu nan ta reuni pa dicidi pa horta esnan cu si ta traha pa aporta na cuminidad. E garantia ta sinta den encurasha esnan cu nada di hasi pa busca un preparashon, manera e programa di ARUMIL of e programa di Compromiso cu Aruba of e oportunidad di bay skol. E garantia ta bin ora pueblo no tin miedo di reclama of denuncia maldad. Nos tin cu traha hunto cu gobierno embes di boycut e y hinca idea den cabes di esnan debil.
Reply
El zorro
| #
Awor KPA mester press nan pa nan bisa ta ken ta trese nan Aruba.
Sigur sigur boso lo haja sorpresa. Nos mes un hendenan ta complice di e bandidonan aki. Boso ta corda cuanto biaha autoridad a intercepta botonan local cu stranhero/ilegal abordo y con nos flamante OM ta laganan bai. Con a para cu e grupo cu a keda atras despues di a bin den un crucero Aruba? Esaki lo no ta e ultimo atraco, corda cu e hendena cu a keda atras mester come / bebe y di unda nan lo haja plaka? Contesta:” Di horta y atraca nos hendenan”
Reply
Rioolnieuws
| #
CUA pais por duna un garantia pa seguridad di pueblo???? Nombrami UN pais cu no tin criminalidad paso nan gobierno ta garantisa nan siguridad. Bai ta papia bobedad om, nada drechi di publica bosonan no tin, blo saca gal riba nos PM cu ta gobernando tremendo, boso di mep no por, i nunca mas boso lo bin na mando……baha na awa om! Instigadores!!!!!
Reply