Aischal van der Linde di Brazil Taekwondo Stichting a gana Oro na Toronto, Canada

Diasabra atardi, Aischal van der Linde a logra haci historia pa Aruba, ora cu e ta logra vence su contrincante Sibyl Tan di Canada, den un pelea cu a bay sudden death y double elimination. Aischal van der Linde a bringa den e categoria di dama adulto te cu -49 kilo, un campeonato cu tabata double elimination. Un total di cuater pelea pa Aischal cu sigur no a bay facil, mirando cu ta creme de le creme, Aischal a enfrenta na Canada. Aischal a yega e final sin perde un combate, pero ta perde for di e propio Sibyl Tan di Canada 1 – 0 den sudden death. Den e double elimination, ambos peleador ta bataya bon, pero Aischal a scop despues cu e referee a para e pelea unda cu Aischal a bin haya un strafpunt aki Sibyl Tan di Canada ta gana e pelea. Pero mirando cu Aischal no a perde niun combate y Sibyl Tan si, nan lo mester a bolbe enfrenta otro. Bou guia di coach Teo Rodriguez y apoya pa e resto di crew, Aischal enfrenta Sibyl Tan pa e di tercer biaha. Mester bisa cu Aischal a sa na bataya bon caminda umbes mas e pelea a bay completamente na su fabor, aki Aischal no ta perde pa gana y ta logra vence su contrincante Tan di Canada cu e score final di 7 – 3 y asina logra e medaya di oro pa Aruba, Aischal su prome medaya di oro den un torneo grandi manera e Open di Canada. Nos a combersa cu Aischal telefonicamente unda el a bisa nos cu el a duna bataya, pero e no tabata facil, danki na nos creador cu el a sigui lucha te gana su medaya di oro pa Aruba.
Den su prome pelea Aischal a gana 3 – 1 for di Jerikka Nahibuan di Canada y den e siguiente pelea un bes mas e ta logra triunfo. Cu a medaya di Aischal, Aruba ta logra medaya di Brons di Stuart Smit y medaya di Oro di Aischal van der Linde den e prestigioso Open di Taekwondo na Canada. Coach Teo Rodriquez di Tiger Taekwondo Academy kende a prepara Aischal van der Linde di Brazil Taekwondo Stichting a keda masha contento cu su logro di un medaya di Oro. Di aki banda nos kier a felicita henter e crew, bou guia di coach Teo Rodriguez, kendenan a sa na haci un tremendo papel na Canada.